sandøya (sandinsle)

amne wochenänd scho zemlich lang her beni met de alksandra und erem gastvater en fründ vo erem gastvater ga bsueche, Søren heisst de, wo allei uf de "sandinsle" wohnt.
er esch eigentlich vo dänemark aber läbt scho set öpe 25 jahr in norwege. dur en chrankheit häd er epilepsi becho und häd mega vell medikament müesse neh zom es normals läbe füere. uf de insle aber chonnt er ganz ohni medikament us, wels da keine sehr lute grüsch oder liechtimpuls, wo epileptischi afäll uslösed, get. oder die wos get häd er sich glehrt demit umzgah, und er häd glehrt sich sälber so guet izschätze, dass er genau weiss wänn er sich en pause sött gönne oder so.
ufem hiwäg häd ois de aleksandra ere gastvater alles so verzällt, und gseit, dass mer ois z.b. ned wundere sölled wänn de søren plötzlich en handstand macht oder so, das segi dänn wel er merki dass ehm das hälfi.
met dem im hinderchopf han ich mich dänn gfrögt wie das ächt werd und so. aber alles unbegründet, ich han sälte en liebere, offene, lustige und umgängliche mänsch troffe.
er häd z.b. grad am afang gseit, dass wämer uf ergendöpis lust heged ois das eifach ga hole ga sölled. und eimal womer znacht gässe händ hani chli vonre sauce probiert, han sie ned so gern gha und ned ganz ufgässe. er frögt "häsch d'sauce gern gha?". ich, höflich wiemer halt esch "ned eso eigentlich". er häd ufglacht und gseit "chasch ruhig säge dassd sie überhaupt ned gern gha häsch, das macht doch nüt" ;)
dänn eimal womer grad metem ässe fertig gsi send esch er mit de schüssle met crevetteschale ufgstande und barfuess, mit wehendem bart und irgendwelchi jodel-sing-ähnlichi luut machend, und dur hagel und schnee zom meer abegrännt und häd die ad vögel verfüeteret.

d'aleksandra und de hund vo erere gastfamilie, d'stella

ich & d'stella (mer gseht, mer send s'ganze wochenänd met extrem funktionelle chleider und umgschminkt umegloffe:P)

oises gepäck (mer händ ässe, blueme, und blueme erde för de Søren mitgna)

d'fähri, sie gad 4 mal ide woche zode sandøya. aber es get au lüt wo ufenre insle wohned womer met de fähri öpe en halb stund fahrt, und die pendled dänn jede tag vo dete id stadt.

de roti chreis esch tromsøya, also d'insle wo tromsø druffe esch.

han mich voll a harry potter erinneret gfühlt, det wo de dumbeldore und de harry de einti horkrux ide höhli gönd ga usehole ;)

am möveeier "pflücke" (das seit mer ernsthaft uf norwegisch so, eier pflücke!)

und dänn häds zwöschedure mal weder chli gschneit

mit dem chessel wo voller wasser gsi esch hämer tested öb d'eier scho jungi dinne händ. wänn s'ei schwömmt heisst das, dass s'junge dinne scho agfange häd s'eigäl ufzässe, drum häds dinne en hohlrum und s'ei stigt.

wiemer gseht esch s'wätter mega wächselhaft gsi, es häd chönne schneie und 5min spöter häd d'sonne gschunne und de himmel esch blau gsi.

seehünd send um oises boot umegschwomme :D

waffle :D

in real esch das na veell idrücklicher gsi, s'tal gad mega tüüf abe, und dune esch s'meer stürmig und ufgwüelt gsi, han mer richtig chönne vorstelle wie d'wikinger da ide harte natur ums überläbe kämpf händ :D det unde händ ide wikingerziit tatsächlich einigi wikinger gläbt.

und es häd gwindet wie nüt, ohni chappe und kapuze hani mi gfühlt als wör de wind min chopf usfrüre

d'ruine vonre alte chile

d'glogge esch original vom mittelalter, und de turm esch spöter ufbaut worde zum en platz för d'glogge ha.  das gfühl, wo   die gloggeschläg dur s'ganze tal ghallt send... so richtig natur-alt-ehrwürdig.

uf das föteli beni voll stolz :D

dubioses fisch skellet

em Sören sis huus

de  Søren macht im sommer emmer mega vell gonfi sälber, er häd tusigi vo tupperwares med unzählige verschednige gonfis

rüereier gmacht us möveeier

mis möveei.

mich häd de gedanke, dass das ei vonre möve chonnt so geklet, dassis grad mal fertig bracht han es paar biss rüerei z'neh. und s'schlimmste: woni mis ei afange han schäle esch doch tatsächlich sones schwarzes netzteil über s ganze ei gsi, und imne eggli esch so es chlises schwarzes chugeli gsi :S ich werd niiie meh probiere es möveei z'ässe!!!

de Søren und de Alf (de Aleksandra ere gastvater)

de felsspalt esch öpe 5m lang, und mer send det dure gange, und am schluss usegchlätered.
de sag nah wohnt d'huldra(usgsproche hüldra)det inne. d'huldra esch en sehr schöni frau wo met erem gsang männer zo sich lockt, und sich i tier chan verwandle. und sie häd es loch im rugge. und wämer das loch im rugge gseht, dänn gets nüt als devoränne :P

womer us de spalte usegchläteret send

und plötzlich häds weder gschneit...

5 min spöter...

die insle heisst fugleøya, also vogelinsle, wel det so vell vögel läbed. uf sandøya esch das sone art ritual gsi wänn buebe zom ma worde send. mer esch erst en ma gsi wämer ufem gipfel vode vogelinsle gsi esch.
de letschti wo det obe gsi esch, esch en ma vo tromsø gsi wo en frau vode sandøya ghüratet häd. alli händ ehn so belächlet als verweichlichts stadtchind, und gseit er müessi zerst uf d'vogelinsle ufe. er esch dänn met es paar männer vode sandøya det ufegstige. d'schwerigkeit uf de vogelinsle esch, dass alles voll vo vogelschissi esch, und drum extrem glatt. bem abelaufe hegi er hoch und heilig gschwore, dass er nie meh i sim ganze läbe en fuess uf die insle setze werdi wänner heil abechonnt.

de Søren häd au ganz vell gwächshüser

Aleksandra, Søren und Alf, womer waffle gässe händ chorz bevor mer gange send

definitiv ned s'schönschte bild ever, aber ich hoff es punktet met natürlichkeit :P

wunderbari gigantischi hängematte

by the way, am 29.Juni 6:00 gad min flug vo tromsø!!! bes am 3.juli esch s'YES camp in berlin (Young European Seminar), das esch es camp vo YFU wo för alli ustuschschüeler esch wo vo europa uf europa in ustusch gange send.
am 3.juli am halbi 11i am morge gad de zug vo berlin richtig schwiz, und am viertel vor 6i chom ich in basel ah. s'esch weniger als en monet bes ich dihei ben....
ich probier ned mal asatzwis mini gfül da na chorz zämezfasse, chonnt dänn imne spötere blogpost :)

allerliebsti grüess <3