Ostere, Ski & Natur

Ostere in norwege, das bedüted folgendes: di ganz familie schmeisst sich is auto und düst ab zode "hytta"(hütte). Bsonders beliebt send hüttene im rustikale stil womer kei flüssend wasser, kei strom und internet und es plumpsklo häd und wo nur mit scooter z'erreiche send.
Us unerfindliche gründ ghöred au krim büecher und film zo ostere. Und dänn gad mer natürlich massewis "på tur"(usgsproche: po tür), also "uf tour". Mit langlauf-ski gads über berg und tal, zwöschedure macht mer pause, zerst zom orange und/oder kvikk lunsj (usgsproche: kwikk lönsch) z'ässe, dänn zom es lagerfür mache und sich würst grille.

god tur = gueti tour

Ski- und snowboardfahre in tromsø

Skifahre in Tromsø - dasch nöme nüt :D d'ussicht macht de mangel vo meh als 2 abfahrte fast wett :P

D'Solveig (mini gastschwöster, usgsproche Sulvei) und d'Sissel, mini gastcousine und de Solveig eres gotti :)

Ich & d'Solveig

Hytteliv - Hütteläbe

s'wisse hus links im bild esch oisi hytta. die esch in gratangen, det woni scho im august mit unni & trygve gsi ben :)

d'Solveig chorz vor enre lange skitour (woni ned mitgange ben wels sogar för sie und d'Unni en schwerigi tour gsi esch, ned uszdänke wie das för mich dänn gsi wär..)

mini ski :D (also eig d'ski vo minre ältiste gastschwöster, aber das übergömer jetzt geflissentlich^^)

de Trygve, min gastvater :)

wo de trygve na chind gsi esch händ döt inne chüe, ochse, schaf und rösser gwohnt, jetzt eschs en lagerplatz för alli mögliche unnütze sache ;)

vor mim erste langläufle versuech. (d'orange hani ide hand wel das lut norweger zom langläufle ghört :P)

di fantastischi landschaft

woni öpe 20 meter ufegloffe ben häd mich d'erschöpfig id chnü zwunge und ich han müesse es päuseli ilegge...

woni scho zemlich wiit ufegloffe gsi ben send mer d'ski verleidet und ich ben chli umegloffe und han d'landschaft gnosse...

... und ben nachher uf d'ski gsässe und abegschlittled :D

z'bsuech be verwandte

d'ussicht vode hytte

alli zäme :) v.l.: Sissel, Lena & Torkel (verhüratet, er esch de Sissel ere brüeder), Gunn (de Sissel und em Torkel eri mueter), Unni, Solveig, Erle (tochter vode Lena und em Torkel) und Trygve

d'Unni (mini gastmueter) met de Erle

brötle im Schnee :P

d'Erle & Ich

Solveig, Erle & Ich

d'Hütte

Gunn (sie häd mer zom geburtstag socke und zo wienachte händsche glismet gha:D), Ich & Sissel

ich fends soo cool dass d'milchpakige immer de jahresziite apasst send!! da esch ei siite vom osterekrimi :P

die osterschoggieier send au sehr oster-typisch. wämer sie vor und a ostere chauft sends uuh mega tür, aber, gewitzt wienich bin hanis mer natürlich erst nach ostere gchauft :D

för die wos ned vo sälber drufchömed: en bedienigsaleitig. (ich han erst nachem ässe usegfonde , dass mer de deckel zivilisiert metm löffel hätt sölle abneh. hans ganz barbarisch eifach abbisse :P)

mit osterpäckli vo diheime eschs grad dopplet so schön!

was wär oster ohni en lindt schoggihas? (ich frög mich aber wo s'rote bändeli abblibe esch.. :P)

und s'supercoole osterpäckli vom gotti, danke! :)

zum nächste post chani voller freud folgendi sache akündige: bade im meer, flohmärt, en mer-send-ja-so-norwegisch-ustuschschüeler-skitour, de hafe vo tromsø vo sinere schönste siite & en wochenend tour uf en traumhafti insle mitem name "sommarøya". (= summerinsle)

und, eifach dasses gseit esch, uf alli sprache woni chan:
ich ben so glöcklich
æ e så lykkelig
je suis très heureuse
I am so happy
sono molto felice
sum multus beata

zum norwegische: das wonich gschribe han esch dialekt, uf bokmål wärs "jeg er så lykkelig"
und zum latin: kein blasse schimmer öb das richtig esch ^^

mit dene wort verabschiede ich mich, uf wiederseh und bes zom nächste mal :)